!!بلوتو

!!الجماعة اللي ساكنين كوكب الأرض كائنات غريبة جداً
هم ما شفوش بلوتو غير في الصور وعمرهم طبعاً ما راحوه
ناسا تقول لهم فيه بلوتو وتوريلهم شوية صور...يصدقوا
ترجع تقولهم ان بلوتو ده طلع قمر مش عارف تابع لايه...يصدقوا
أي حد يقولهم أي حاجة يصدقوا...ولو حاولوا يتغيروا مش بيصدقوا لمجرد الاعتراض
بالظبط زي الجرايد اللي عندهم
جرايد تبينلك ان الدنيا وردييييييييييييي.......وجرايد توريك الدنيا كحليييييييييي
والقراء كل واحد بيجيب الجرايد اللي على مزاجه
لكن مفيش مقاييس عند الجماعة بتوع الكوكب دول يفكروا بيها ويشوفوا الخبر صح ولا غلط
هم ماشيين مع الهوجة وخلاص
بالظبط زي ما عمرو بن العاص قال عن شعب كده عايش على نهر
"قال:"يجمعهم مزمار وتفرقهم عصا
بس أنا حاسس ان الوصف ده يليق على سكان الكوكب كله
ما علينا

حكاية بلوتو ببساطة...إن سكان (المشترى) عاوزين يحتلوه لأن فيه مادة ما
مش هاقدر أقول على اسمها عشان دي أسرار الكواكب الاكتر تقدماً
المهم إن (المشترى) في مجلس المجرة ألف قصة هبله كمبرر لضرب بلوتو
(وطبعاً (زحل) عمل نفسه مقتنع عشان مصالحه مع (المشترى
ومع الضغط، الكواكب العبيطة الصغيرة وافقت
إلا كوكب الأرض...لأن سكانه (الأذكياء) قسموه بينهم بخطوط (وهمية) ع الخريطة
فملهوش حاكم عام نخاطبه...وملهمش تواجد في مجلس المجرة
المهم (المشترى) بالبحث عرف ان أمريكا هي اللي عندها قدرات فضائية
صحيح محدودة لكنها كفايه عشان يقدر يتصل بيهم
المهم
شوية وعود وتنسيق بينهم وبين المريخ عشان يعملوا شوية أبحاث ويجيبوا شوية أمراض مش في كوكبهم عشان يستخدموها في حروبهم اللي بيولعوها عشان نشر الحرية والديموقراطية
وكالة ناسا بتاعتهم نشرت الخبر الكاذب إن مفيش كوكب إسمه بلوتو
والبني آدميين الـ.... الـ... الأذكيا صدقوهم
المهم إن أمريكا رغم تخلفها العلمي والتكنولوجي علمت (المشترى) خدعة حربية جديدة
المشترى أثار فتن وقلاقل بين سكان بلوتو فبدأو الـ... الـ... الأذكيا يضربوا بعض
بدل ما يوفروا ذخيرتهم لحربهم الجاية بيخلصوها في تخليصهم على بعض
ما علينا

المهم
أنا بصفتي الحاكم العام لكوكب أورانوس لازلت عند موقفي في رفض إدعاءات المشترى
ولازلت أعترف ببلوتو كوكباً تابعاً لنجم الشمس...عضواً في مجرة درب التبانة
وأي اعتداء على بلوتو من أي كوكب طماع هيكون بمثابة اعتداء على كوكبي
مهو دور...لو سبناه يعمل اللي هو عاوزه...هيبقى دور يلف علينا كلنا
زي قصة الثور الأحمر
!!عارفينها ولا لأ؟؟؟؟

Super Hero!!

هو الواد بلية الميكانيكي شغال حالياً في المكاكيك (جمع مكوك) اللي هنسافر بيها أورانوس
لكن لغاية ما يخلص قلت بصفتي حاكم الكوكب أفكر إزاي نظبط عيشتنا هناك
وكان أول حاجة جت على بالي هي (سوبر هيرو) نقنعه يجي معانا أورانوس
نفسي يبقى في أورانوس بطل خارق كده يحمينا من الأعداء الخارجيين للكوكب بس للأسف أمريكا كوشت على كل الأبطال الخارقين وماسبتش ولا واحد لبقية الدول

وبصراحة انا فكرت فيها لاقيت معاهم حق
يا ترى لو سبايدر مان كان في مصر كان هيعيش ازاي يا عيني واتخن عمارة عندنا 30 دور بس

يعني على ما يطلق خيوطه، ولا مؤاخذة تلزق في حاجة يكون وقع على جدور رقبته

ده غير سلوك وصلات الدش والـ(دي اس ال) العايمة بين العمارات يعني كان كل شوية هيتشحكل -حلوة هيتشحكل دي؟- في سلك وبرضو هيقع على جدور رقبته

أما باتمان فالراجل يا جدعان ملياردير وعنده استثماراته وشركاته

وبعدين احنا لسه الطرق عندنا محفرة للغاز الطبيعي والبلاعات
فالعربية الخارقة بتاعته دي مش هتمشي اتنين سنتي على بعض

والباشا سوبرمان لو كان هيعيش في كوكب غير كوكب الأرض كان رجع كريبتون

لكن الباشا مسبرنشق في امريكا وبيحب لويس وبيحارب لكس لوثر وحياته آخر تمام

وعائلة الانكريدبلز مرتبطين بمدارس الأولاد
والفانتاستيك فور مشغولين بفيلمهم الجديد

حاولت أشوف في الصين يمكن يكونو اخترعوا بطل خارق مضروب بتكلفة أقل ملقتش؛ أول مرة اتصدم فيهم
من الآخر لازم نشوفلنا بطل خاص بينا يكون ابن بلد ومجدع كده ويكون بيعبر عن بلدنا مش مستورد حتى نبقى عارفين أصله وفصله

ومفيش مانع يكون شبه أبطال الجماعة الامريكان

وبما ان محدش فينا مليونير ولاحد فينا جاي من كوكب تاني يبقى باتمان وسوبرمان مينفعوش

وبما ان عندنا أنيميا البحر المتوسط وأمراض الكبد وطبعا معندناش حد مولود خارق يبقى الانكريدبلز أوت
الوحيد اللي ينفع نشوف واحد زيه هو سبايدرمان ديتها نشوف حشرة بتقرص

تقرص حد مننا وهوب يبقى عندنا بطل خارق

والحمد لله عندنا كمية وأعداد غفيرة من الحشرات اللي بتقرص وبتعض كمان

زي مثلاً:

(التعابين(ده لو اعتبرناها حشرة

الناموس

البراغيت

القمل

البق

النمل........إلخ

كفاية كده

التعابين بتزحف وكل شوية قال هتغير جلدها وممله

الناموس قرص كيتو بقرش صاغ بيموته

القمل بصراحة مقرف والبق شرحه

النمل ميشتغلش غير في جماعات وأي فليت حقير ممكن يقضي عليه

الوحيد اللي ينفع هو البرغوت

مبهزرش...فكروا بس معايا في مميزاته


لسه ماخترعوش مبيد يقضي عليه
كمان عليه حتة دين نطة...شديدة
كمان لو لزق لحد بيطلع عينه وهو ده المطلوب
كمان الحمد لله متوفر يعني ممكن نعمل مليون رجل برغوت
وممكن ما نحتاجش جهاز شرطة ولا جيش ولا حاجة
ونكتفي بـ(الرجال والحريم البراغيت) اللي هيملو الكوكب


إيه رأيكم؟

موافقة؟

إذن قررنا نحن الحاكم العام لكوكب أورانوس إصدار امر بالقبض على كل براغيت البلد وتلاتة اربعة مليون متطوع عشان يبقو خارقين

!!أورانوس

الحياة مرة والواقع أمر وكلاهما يقودني للانتحار "
فأهرب من واقعي إلى الاحلام التي تقود للجنون
"!!وبين الجنون والانتحار يدور قلبي
شريف عبد اللطيف
********************************************************************
علمونا في علم النفس أن الـ(سكيزوفرينيا/الفصام) درجاتٌ
!!أدناها أحلام اليقظة وأعلاها حين تبدأ في التحدث عن أورانوس الذي تحكمه
!!ولا أخفيكم سراً ؛من فترة -بتاع سنة كده ولا حاجة- جاءني وفدٌ من أورانوس يطلب مني التكرم بقبول المنصب
(final)وهو ما أسعدني في الواقع لكني -للأسف- اعتذرت لانشغالي بامتحانات الـ
!!يالا...أرزااااااااق
!!في الواقع أبداً لم أتوقع أن تصل أحلام اليقظة معي لهذه الدرجة لكنه حدث
!!كان علي أن أتوقف حين صارت ثلاثية الأبعاد بل ولها لونٌ وطعمٌ ورائحةٌ
!!أتفاعل معها لدرجة التحدث مع خيالاتي بصوتٍ هادر بل والضحك لدعاباتهم والبكاء إذا كان الحلم مؤثراً
!!ومع سماعي لدقات الـ(سكيزوفرينيا) على بابي أشعر -وياللعجب- بسعادة
ربما كوني أعيش وحيداً جعلني أشعر بالألفة مع هذه الخيالات التي لا أتخلى عنها مطلقاً
!!إلا في وجود البشر العاديين الذين لا يملكون أي مواهب لحكم أورانوس
!!الحمد لله أني أحيا وحيداً وإلا شك الناس في سلامة عقلي
!!لكن في زياراتي لأهلي يتساءلون عن سبب (ابتسامتي/عبوسي) (التي/الذي) (تظهر/يظهر) فجأة
حكيت هذا لصديقي الأنتيخ
:فتح فمه من الأذن للأذن ثم ضحك لمدة نصف ساعة وقال
"!!لسه بااااااااااادري...أنا يا بني بيسألوني:(بتضحك ليه) وأنا أصلاً مش بضحك"
!!ولما أخبرته عن أورانوس أخبرني أنهم عرضوا عليه المنصب أيضاً
!!وأمام إلحاحهم قبل المنصب بالفعل ووعدني أن يتخذني وزيراً بعد الامتحانات
!!وهذا لم يغضبني فليس المهم ما منصبك ،المهم أن تخدم أورانوس بتفانٍ
الآن -ودائماً- وأنا أذاكر وفي الفواصل بين الـ(شباتر) -وبين السطور أيضاً- أكتفي بالفوز بـ(رولان جاروس) والتبرع بالجائزة لفلسطين
حينها طلبوا مني أن أصير سفيراً للنوايا الحسنة لدى الأمم المتحدة لكني رفضت
!!فلن أكون سفيراً لمن يكيلون بمكيالين ويكيلون لنا الضربات أيضاً
وأحياناً اكتشاف (لقاح) -لأ مش علاج- للسرطان فالفوز بنوبل والتبرع بها لمستشفى سرطان الأطفال
وأحياناً رئاسة قسم طب الأطفال -أو أي قسم- ووضع امتحان سهل للطلبة الغلابة
!!أو عميداً للكلية وإلغاء امتحان الشفوي عشان الكوسة والظلم
!!الواحد مش عارف يعمل إيه ولا إيه بس أنا حاسس إن أنا مهم ومحدش مقدرني
(طب أودعكم بأى لأن كده دخلنا على الـ(بارانويا
...فقط أضيف أني ما كتبت هذا طلباً للعلاج ولكنها دعوة لهؤلاء الموهوبين
!!دعوة لإنشاء جمعية حكام أورانوس


الدعوة عاااااااااااامة وهتبأى لااااااااااااامة